Etwinning

Creatividad itinerante en 'Art on the Move'

Izenburua: Art on the move

Hezkuntza Etapa: Haur Hezkuntza eta Lehen Hezkuntza

Irakasgaia: Diziplina artekoa

Artea beste kultura europar batzuk ezagutzeko tresna, adiskidetasun harremanak sortzeko eta kultura europarraren sinbolo eta baloreak ezagutzeko eta norberaganatzeko. Ideia horrek bultzatu zituen Espainia, Finlandia, Erresuma Batua, Polonia eta Bulgariako bost ikastetxetako ikasle eta irakasleak ia bi urteko abenturari ekitera.

Adiskidetasun harremanen sendogarri izan ziren, era berean, proiektukideek beren mobilitateetan izan zituzten topaketak, hain zuzen ere, eTwinning-en eta Comenius elkarte baten arteko uztartzearen erakusgarri ona da proiektu hori. Oraingo honetan, eTwinning-ek areagotu egin du ikasgelako esperientzia digitalak eta areagotu, era berean, kideen arteko elkarreragina eta elkarlana. Halaber, eTwinning-ek eskaini ditu eskaini beharreko tresna digitalak ikasleek, irakasle beti arretatsu eta ekileak gidari dituztela, arte adierazpenen bidez proiektuko kide diren herri guztietara bidaia kulturalak egin ditzaten.

Europaren dibertsitatea eta aniztasuna ezagutzeko bidean, lanean eman dituzten bi urteetan, oso era sortzaile eta originalean tratatu dituzte askotariko gaiak, hala nola, usadiozko jaiak, proiektuan kide diren herrietako gizarteetan familiak duen garantiza, pertsonen arteko harremanak, Europako jaiak, herri bakoitzeko monumentu famatuak, literatura eta liburuak, musika eta dantza, proiektuan kide diren herrietako pertsonaia famatuak (artistak, politikariak,…), eta abar.

“Art on the move” proiektuko ikasleen kultur bidaiek ia arte adierazpide guztiak ukitu dituzte: marrazkiak, pinturak, eskulturak, antzezpenak, dantza tradizionalak, argazkiak, film txikiak, literatur sorkuntzak, etab. Proiektuaren emaitza arte material itzela da, ikasgelan berrerabil daitekeena, wiki batean ederki antolaturik gordeta geratu eta erraz bistara daitekeena. IKT tresna hori oso da egokia lankidetzan jarduteko.

Cristina Grau eta Jessica Juárez irakasleek osatzen duten irakasle-taldeak hartu du “Art on the move” koordinatzeko ardura. Lanaren plangintza xehe-xeheak eta jardueren denboralizazioak erakusten du koordinazio ona eta partaide bakoitzari izendatu zaizkion egiteko eta rolen banaketa arretatsua. Eta plangintza on hori azkenerako sortu diren materialen aski kalitate onaren isla da, parte hartu duten herrietako kultur eta arte gida benetakoa.

“Art on the move” proiektuko ikasle eta irakasleen abentura artistikoak bi aldi desberdin ditu: lehenengoan helburua ikasleak proiektukideen kulturetara hurbilaraztea da; bigarrena, berriz, ikasleengan elkarlanaren interesa eta elkarlanean aritzeko gogoa piztea da, eta horretarako ikasleen arteko elkarreragina eta lankidetza sustatuko dituzten jarduerak diseinatzea. Hori guztia ingelesa lagungarri dela, hizkuntza hori erabili baitute haur horiek elkarren arteko hizkuntza gisa kultura europarraren dibertsitatea eta aniztasuna ulertzeko. Edo, Cristina Grauk esan bezala: “Irakatsiz, ikasiz eta herri bakoitzeko tradizio, ohitura eta ezaugarriak errespetatuz egiten ditugu lagunak, kode komuna eta kanal bera erabiliz: ingeles hizkuntza IKTen bidez”.

Proiektuak izan duen arrakastak erakusten du ikasleen adinaren txikia ez dela eragozpena elkarlanerako. Aitzitik, Haur eta Lehen Hezkuntzako ikasle horiek erakutsi dute elkarlaneko jardueren zaletasuna eta teknologia berrietarako interes handia. Elkarlanaren esparruan, azpimarratzekoa da irakasle bihurtu diren ikasle proiektukide batzuen ekimena: bideotutorialak grabatu zituzten beren proiektukide europarrei dantza tradizional bat erakusteko. Ikus dezakezue hemen ikasle eta irakasle finlandiarrek proposatutako dantzaren bertsio espainiarra.

Era berean, parte hartzen zuten haurrek beren irudimenari hegan eragin zioten, eta, beren adiskideen laguntzaz, elkarlanaren bidez ingelesez ipuin batzuk sortzea lortu zuten, eta garbi erakutsi zuten atzerriko hizkuntza bat ikastea eta sormena bata bestearen pare doazela. Ipuin berri horiek marrazki liluragarriz irudiztatu dira, ikasleen dohaina, originaltasuna eta fantasiaren erakusgarri. Era erraz eta xumean lortu dute proiektuan ikaskide izan dituztenekin kultur dibertsitatea eta aniztasuna konpartitzea, bestengana hurbiltzea eta kultur esparru europar komuneko partaidetza sentimendua indartzea.