Sae fóra e aprende!
Go outside and learn! (GOAL) Así se chama o proxecto que levou a cabo un centro galego cos seus socios europeos. Un proxecto perfectamente planificado e coordinado que, á vista dos resultados da avaliación final realizada, cambiou a percepción que moitos alumnos tiñan da materia de matemáticas.
Medir rampas, elaborar sextantes para calcular a altura de edificios, reproducir o experimento de Eratóstenes para medir a circunferencia terrestre, calcular o número de árbores na rexión son algunhas das moi variadas actividades que desenvolveron os alumnos “sobre o terreo”. E é que, rebasando as fronteiras da aula, os alumnos saíron ó exterior a realizar traballo de campo.
As actividades, adaptadas ós distintos niveis dos estudantes, incorporan ademais aspectos como a educación en valores e o ensino entre iguais. Así, os sextantes creados por uns alumnos son utilizados polos socios, e os estudantes elaboraron titoriais sobre a utilización de diversas ferramentas TIC, cuxo número e variedade é outro dos puntos fortes do proxecto. Ademais de recorrer ás ferramentas da plataforma eTwinning, como o TwinSpace e o Diario de Proxecto, usouse software específico,realizáronse videos, leváronse a cabo videoconferencias, chats e presentacións, e incluso se creou unha rede social con Mixxt.
As matemáticas son así tratadas dun xeito novidoso e motivador, nun contexto real, ó tempo que se mellora a competencia lingüística e se traballa a dimensión europea da educación, todo isto no marco dun traballo de marcado carácter colaborativo.